Nakatakdang magpalabas ng ASF o African Swine Fever Zoning Plan ang Department of Agriculture para matigil ang pagkalat ng nasabing sakit sa mga baboy.
Ipinabatid ni Dr. Reildrin Morales, director ng Task Force on Swine Diseases na ang buong Visayas at Mindanao gayundin din ang island provinces ng Mimaropa o Mindoro, Marinduque, Romblon at Palawan gayundin ang Masbate ay ide-deklara nilang ASF free zones.
Sinabi ni Morales na ang naitalang kaso ng ASF ay nasa Luzon na siyang magiging containment zone kung saan nakapaloob ang protected zones, surveillance zones at infected zones.
Kabilang aniya sa protected zones ang Cordillera Region at Regions 1, 2 at 5 samantalang nasa surveillance zones ay mga lugar na mayroong mataas na panganib o high risk ng ASF at tinututukan nila rito ang Regions 3 at 4-A.
Tinukoy ni Morales ang Bulacan at Pampanga bilang infected zones o mga lugar na mayroong naitalang kaso ng ASF.
Inihayag ni Morales na ang free zones ay clean zones kaya’t ang mga magbababoy dito ay uubrang ipadala ang karneng baboy nila o ano mang produktong baboy sa anumang lugar sa bansa.
