Nakatakdang talakayin ng House Committee on Rules ang committee report hinggil sa impeachment complaint laban kay ousted Chief Justice Maria Lourdes Sereno ngayong araw.
Ayon kay Majority Leader Rodolfo Fariñas, chairman ng nasabing komite, kabilang sa kanilang agenda sa pagbubukas ng sesyon ang committee report sa impeachment complaint laban kay Sereno.
Sinabi pa ni Fariñas, kanila munang hihintayin ang kopya ng final resolution ng Korte Suprema sa usapin ng pagpapatalsik kay Sereno bago nila dalhin sa plenaryo ang impeachment complaint at pagpasyahan ang magiging susunod nilang hakabng.
Una nang inihayag ni House Committee on Justice Chairman Reynaldo Umali na mas nanaisin niyang tuldukan na ang impeachment complaint at huwag na itong pagbotohan at iakyat pa sa Senado.
Kasunod na rin aniya ito ng desisyon ng Korte Suprema na pumapabor sa quo warranto petition laban kay Sereno na kumukwestiyon sa validity ng pagkakatalaga dito.
—-
