Patay man o buhay, nananatiling gawa-gawa lamang ang testimonya ni Jaybee Sebastian laban kay detained Sen. Leila De Lima.
Ito ang tahasang banat ni De Lima matapos na mapaulat na kabilang si Sebastian sa mga nasawing inmate sa New Bilibid Prison (NBP) dahil sa coronavirus disease 2019 (COVID-19).
Ayon kay De Lima, pinag-aaralan na ng kaniyang mga abogado ang posibleng maging epekto ng pagkasawi ni Sebastian sa kasong kinahaharap ng senadora, lalo pa’t si Sebastian aniya ang itinuturing na ‘star witness’ laban sa kanya.
Matatandaang Oktubre taong 2016 nang ituro ni Sebastian si De Lima bilang protektor ng operasyon ng ilegal na droga sa Bilibid.
Gayunman, muli namang bunuwelta ang senadora at sinabing ang mga pagkasawi ng mga bilanggo sa COVID-19 ay dahil lamang sa kapalpakan at kabagalang kumilos ng administasyon sa nasabing krisis pangkalusugan na kinahaharap ng Pilipinas.
