Naghain ng diplomatic protest ang Pilipinas laban sa gobyerno ng China.
Ito ay kaugnay ng insidente kung saan kinumpiska ng Chinese coast guard ang mga gamit pangisda ng mga Pilipinong mangingisda sa Scarborough Shoal o Bajo de Masinloc.
Matatandaang tinawag na iligal ng mga otoridad ang ginawang pag-kumpiska ng Chinese coast guard sa fishing device ng mga Pilipino na tinatawag na ‘payao’ sa bansa.
Naganap ang naturang insidente noon pang Mayo, sa layong 124 nautical miles ng Palawan.
Ayon sa Department of Foreign Affairs (DFA), mariin ding kinokondena ng Pilipinas ang pagpapatuloy ng China sa pag-iisyu ng anila’y radio challenges sa mga Philippine aircraft na nagsasagawa ng maritime patrol sa bahagi ng West Philippine Sea.
Batay sa inilabas na arbitral tribunal ruling ng The Hague noong Hulyo 12 taong 2016, pinaboran nito ang petisyon ng Pilipinas na ipawalang bisa ang historical ‘nine-dash-line’ claim ng Beijing sa pinag-aagawang teritoryo na West Philippine Sea.
