Pinayuhan ng Malacañang ang mga Pinoy sa New York na manatiling kalmado at mapagmatyag sa paligid.
Ito ay kasunod ng nangyaring pagsabog sa Chelsea, Manhattan sa New York sa Estados Unidos na ikinasugat ng 29 katao.
Ikinalungkot naman ni Communications Secretary Martin Andanar ang pangyayari.
Aniya, patuloy ang ginagawang monitoring ng Philippine Consulate General sa New York sa sitwasyon.
Una nang sinabi ni New York Mayor Bill de Blasio na walang banta ng terorismo sa lungsod ngunit sinadya ang pagsabog.
Samantala, kinumpirma ni Philippine Consul General Mario de Leon na walang pinoy na nadamay sa pagsabog sa Chelsea, Manhattan sa New York.
Ayon kay De Leon, batay sa kanyang pakikipag-ugnayan sa Filipino community sa New York, ligtas naman ang mga ito.
Nasa 80,000 ang mga Filipino sa New York na karamihan ay nasa Queens.
Idinagdag pa ni De Leon na patuloy nilang minomonitor ang sitwasyon.
Sa ngayon ayon sa Consul General, maraming mga daan sa New York ang pansamantalang isinara at naglatag ng mga precautionary measures.
By Mariboy Ysibido