Kumpiyansa ang Department of Justice (DOJ) na walang magiging matinding epekto sa pagpapatuloy ng kaso ni Senadora Leila De Lima ang pagkamatay ng high profile inmate na si Jaybee Sebastian.
Ayon kay Justice Secretary Menardo Guevarra, isa lamang si Sebastian sa listahan ng mga testigo laban sa senadora na nahaharap sa tatlong kaso na may kinalaman sa iligal na droga.
Sinabi ni Guevarra, nakatitiyak siyang hindi maaapektuhan ng pagkamatay ni Sebastian ang kabuuang stratehiya ng prosekusyon sa pagsasakdal kay De Lima.
Magugunitang kinumpirma ng Bureau of Corrections (BuCor) sa DOJ ang pagkamatay ni Sebastian dahil sa coronavirus disease 2019 (COVID-19) at agad na pagpapa-cremate sa labi nito.
