Naging isang pagsubok para sa mga Cebuano ang tahasang pagtawag sa kanila ng Pangulong Rodrigo Duterte na matitigas ang ulo’t pasaway.
Ito ay ayon mismo kay Cebu City Vice Mayor Michael Rama kung saan inamin nitong naging mabuti ang pagiging prangka ng pangulo.
Ayon kay Rama, naging maganda ang hakbang ng pangulo na ipadala si Department of Environment and Natural Resources secretary Roy Cimatu sa Cebu City upang tutukan ang patuloy na pagtaas ng bilang ng kaso ng coronavirus disease 2019 (COVID-19) sa lugar.
Matatandaang kamakailan lamang nang isisi ni Pangulong Duterte sa katigasan ng ulo ng mga Cebuano ang patuloy na pagtaas ng COVID-19 sa lungsod na dahilan rin sa paglalagay sa Cebu City sa enhanced community quarantine (ECQ).
