Aminado si NCRPO Chief Police Major Gen. Guillermo Eleazar na wala pa rin silang suspect sa nangyaring pamamaril sa isang pulis sa kahabaan ng EDSA-Connecticut noong Martes, Marso 26.
Ayon kay Eleazar, patuloy pa rin nilang ini-imbestigahan ang nangyaring insidente, kung saan bumuo na sila ng isang special task group na tututok sa kaso.
Matatandaang, Martes nang barilin ng hindi pa nakikilalang suspect si Police Senior Master Sergeant Solomon Cugay sa EDSA.
Paliwanag ni Eleazar, isa sa mga anggulong tinitignan ng mga otoridad ang naging trabaho ni Cugay sa anti-illegal drugs operation.
Aniya, posibleng binalikan lamang ito ng mga personalidad na nakabangga nito sa mga nasabing operasyon.
Samantala, nanawagan naman si Eleazar sa publiko na agad na ipagbigay alam sa mga otoridad ang anumang impormasyon na makapagtuturo sa suspect sa nangyaring pananambang.
