Ibinabala ng Philippine National Police (PNP) ang malisyosong pagpapakalat ng larawan ni PNP Chief Archie Gamboa na umano’y nasa isang party sa kasagsagan ng community quarantine.
Ito ay matapos na i-post sa website ng Philippine Star ang larawan ni Gamboa kasama ang ilang pribadong indibidwal at pinapalabas umano ito’y kuha sa isang party sa Baguio City nitong nakaraang linggo.
Ayon kay PNP Spokesperson Brig. Gen. Bernard Banac, ang larawan na kumakalat ay kuha pa noong Pebrero kung saan hindi pa umano ipinatutupad ang community quarantine.
Iginiit naman ni Banac na mahaharap sa kasong kriminal partikular na sa paglabag sa Republic Act 10175 o anti-cybercrime law ang sinomang indibidwal na mahuhuling nagpapakalat nito sa social media.
