Agad na sasagutin ng pamahalaan ang mga isinasampang petisyon laban sa kasasabatas lamang na anti terror law.
Ito ang naging reaksyon ni Department of Interior and Local Government (DILG) Sec. Eduardo Año, matapos na magsampa ng mga petisyon ang iba’t-ibang grupo para kuwestiyunin ang constitutionality ng naturang batas.
Sinabi ni Año, malaya naman ang lahat na kuwestiyunin ang naturang batas, at handa ang pamahalaan pati na ang solicitor general na sagutin ang mga ito.
Matatandaang, kaliwa’t-kanan ang naging pagtutol sa naturang batas dahil sa mga umano’y kuwestiyunableng probisyon nito na hindi naayon sa saligang batas, at maaring magamit at maabuso ang mga kritiko.
