Iminungkahi ni Senior Citizen party-list Representative Francisco Gamboa Datol Jr. sa Inter-Agency Task Force (IATF) na payagan ang mga laundry shops na makapagbukas sa kabila ng pagpapalawig ng enhanced community quarantine (ECQ) hanggang April 30.
Ayon sa mambabatas, ang laundry services ay may pangunahing serbisyo sa bayan alinsunod na rin sa paalala ng Department of Health (DOH) na kailangang malabhan mabuti ang mga damit upang makaiwas sa coronavirus disease 2019 (COVID-19).
Ikinokonsidera rin aniya na maraming Pilipino ang wala nang oras sa paglaba dahil ginugugol ng mga ito ang kanilang oras sa pagpila sa mga public markets, supermarkets, at drugstores.
Suhestiyon pa ng kongresista, maaari namang ipatupad sa loob at labas ng mga laundry shops ang physical distancing at lilimitahan lamang sa apat hanggang limang customers ang papayagang makapasok.
