No-entry pa rin sa mga malls sa Cavite ang mga kabataan na 14 na taong gulang pababa.
Ito ang naging paglilinaw ni Cavite Governor Jonvic Remulla kung saan sinabi nitong tanging ang mga nasa edad 15 taong gulang hanggang 65 taong gulang lamang ang maaring papasukin sa anumang mga shopping center sa lalawigan.
Humingi rin ng paumanhin si Remulla kaugnay ng kanyang unang pahayag na maari nang papasukin sa malls ang mga 10 taong gulang pataas basta’t may kasama itong nakatatanda.
Aniya, masyado lamang siyang naging optimistic dahil nais naman niyang pagbigyan ang mga kabataan na ‘tila naka-bartolina sa kani-kanilang mga tahanan.
Sa Metro Manila, nagka-isa ang mga alkalde na huwag papasukin sa mga malls ang menor de edad dahil sa banta ng COVID-19.
