Posibleng manatili pa rin sa general community quarantine (GCQ) ang status ng Metro Manila hanggang sa katapusan ng Hunyo.
Ito ang naging pahayag ni Presidential Spokesperson Harry Roque, matapos makapagtala ang Department of Health (DOH) ng 331 fresh cases at 248 late coronavirus disease 2019 (COVID-19) cases sa bansa.
Ayon kay Roque, hindi muna isasailalim sa modified GCQ ang Metro Manila pagsapit ng ika-16 ng Hunyo kung patuloy na tataas ang kaso ng COVID-19 na National Capital Region (NCR).
Ibinabala pa ni Roque na posible ring bumalik sa modified enhanced community quarantine (MECQ) ang Metro Manila kung iiksi ang case doubling rate at kung hindi sasapat ang health care facilities para sa mga medical workers na tutugon sa mga tinamaan ng virus.
Samantala, nakatakda naman aniyang makipagpulong si Pangulong Rodrigo Duterte sa mga miyembro ng Inter-Agency Task Force (IATF) bukas, Huwebes, sa Davao City upang desisyonan na ang panibagong quarantine protocols pagsapit ng ika-16 ng Hunyo.
