Nasawi ang 14 na katao, habang sugatan naman ang 45 sa nangyaring kambal na pagsabog sa Bamiyan, Central Afghanistan.
Ayon kay Bamiyan Police Chief Zabardast Safi, kabilang sa 14 na nasawi ang isang traffic policeman.
Kinumpirma naman ni Interior Ministry Spokesman Tariq Arian ang death toll bunsod ng pagsabog kasabay na rin ng pagtiyak nito ng malalimang pagsisiyasat sa nangyaring insidente.
Giit pa nito, hindi umano kapata-patawad ang ginawang krimen na ikinasawi ng 14 at ikinasugat ng 45.
Samantala, itinanggi naman ng grupong taliban na sila ang nasa likod ng kambal na pagsabog.
