Mariing itinanggi ng Malacañang na mataas ang presyo ng Sinovac kumpara sa ibang bakuna kontra COVID-19.
Ito ang naging reaksyon ni Presidential Spokesman Atty. Harry Roque matapos na mapaulat na $36 ang halaga ng Sinovac sa Pilipinas gayong $17 lang naman ang presyo nito sa Indonesia.
Sinabi ni Roque, walang katotohanan ang mga kumakalat na balita lalo pa’t kompidensyal ang mga ganitong uri ng impormasyon.
Dagdag pa ni Roque, sinabi mismo ni Vaccine Czar Carlito Galvez Jr. na hindi naman nagkakalayo ang presyo ng Sinovac sa Pilipinas kumpara sa indonesia na naglalaro lamang sa P670 hanggang P675.
Sinabi pa ni Roque sa oras na magkaroon ang pamahalaan ng supply agreement sa Sinovac ay saka lamang maisasapubliko ang presyo nito.
