Nakumpleto na ng National Bureau of Investigation (NBI) ang kanilang isinagawang forensic investigation sa labi ng nasawing flight attendant na si Christine Dacera.
Ayon kay Justice Secretary Menardo Guevarra, nakikipag-ugnayan na ngayon ang NBI sa Makati Medical Center dahil dito unang isinugod si Dacera matapos itong matagpuang walang malay noong Enero a primero.
Sinabi ni Guevarra na ipauubaya na ng DOJ sa NBI kung nais nitong isapubliko ang resulta ng kanilang imbestigasyon.
Una rito, sinabi ng NBI na nakakuha sila ng urine sample sa bangkay ni Dacera na magagamit naman upang matukoy kung may presensya ng alak o iligal na droga sa kanyang katawan.
Matatandaang, 11 indibidwal ang nasasangkot sa kasong rape with homicide matapos na isangkot sa pagkasawi ni Dacera.
