Balik operasyon na ngayong araw ang isa sa sikat na pasyalan sa Tagaytay City.
Sa kabila ito ng naka-ambang malakas na pagsabog ng Bulkang Taal at nang nakataas na alert level 4 sa bulkan.
Ayon sa pamunuan ng leisure park na Sky Ranch, nais nilang maghatid ng pag-asa sa publiko sa kabila ng panganib na posibleng idulot ng Bulkang Taal.
Kagabi lamang pinailawan na ang 34 na rides sa Sky Ranch kabilang na ang higante nilang ferris wheel upang ipakita umano sa publiko na maka-babangon pa rin ang turismo sa Tagaytay City kahit na naapektuhan ito sa pag aalburuto ng bulkan.
Gayunman, tiniyak naman ng pamunuan ng leisure park na mayroon silang safe-to-operate certificate sa kanilang pagbabalik operasyon, kabilang na ang pagsiguro na malinis, at hindi na balot ng abo ang lahat ng kanilang rides at atraksyon.
