Patay ang isang motorista makaraang mag-karambola ang limang sasakyan sa bahagi ng Shaw Boulevard, San Miguel Avenue, Mandaluyong City bandang alas siete y medya kaninang umaga.
Ayon kay Chief Master Sgt. Raymond Fajardo, punong imbestigador sa naturang pangyayari, nasawi ang motorcycle rider matapos nitong maipit sa pagitan ng mga nag-banggaang sasakyan.
Kabilang ang dalawang kotse, isang jeepney, isang UV Express van, at isang motorsiklo sa mga nag-karambolang sasakyan.
Batay sa inisyal na imbestigasyon ng mga otoridad, nabatid na nawalan ng kontrol ang driver ng jeep na kinilala bilang si Wilfredo Gigante na siyang naging dahilan ng aksidente.
Sa ngayon, hindi pa naman tiyak ang kabuuang bilang ng mga sugatan, habang patuloy pa rin namang inaalam ng mga otoridad ang pagkakakilanlan ng nasawing motorista.
