Hindi nakadalo sa State of the Nation Address (SONA) ni Pangulong Rodrigo Duterte ang ilang mambabatas matapos na magpositibo sa coronavirus disease 2019 (COVID-19).
Bago ang SONA ng pangulo kahapon, isinalang muna ang mga mambabatas sa swab testing upang matiyak ang kaligtasan ng mga indibidwal na pisikal na dadalo sa Batasang Pambansa kung saan ginanap ang SONA ng pangulo.
Muling nagpositibo sa COVID-19 si Senate Majority Leader Juan Miguel Zubiri kung saan sinabi nito na tatlong beses syang nagnegatibo sa COVID-19 rapid test pero nagpositibo naman sya sa swab testing.
Kaugnay nito, nagpositibo rin naman si 2nd District Rep. Johnny Pimentel sa COVID-19.
Dahil dito, kapwa naman tiniyak nina Zubiri at Pimentel na sasailalim sila sa self-quarantine.
Matatandaang kabilang sina Pimentel at Zubiri sa 50 mambabatas na naimbitahang pisikal na dumalo sa SONA ng Pangulong Duterte.
