Nag-aalok na rin ang Philippine Airlines (PAL) at Cebu Pacific ng promo para sa COVID-19 testing para sa mga pasahero nitong babyahe simula bukas, Disyembre 1.
Ayon kay PAL Spokesperson Ciello Villaluna, ang kanilang mga pasahero na may ticket na ay mabibigyan ng P500 discount mula sa P4,500 regular rate ng RT-PCR sa kanilang testing center sa Ermita, Manila.
Aniya, sa loob lamang ng 12 hanggang 24 oras ay maaari nang makuha ang resulta ng COVID-19 test.
Maaari namang makapili ang PAL ticket holders kung nais nito mag drive-thru o mag walk-in sa testing facility na bukas tuwing Lunes hanggang linggo mula alas-8 ng umaga hanggang ala-5 ng hapon.
Samantala, ilulunsad naman ng Cebupac ang Test Before Boarding (TBB) feature na naglalayong maisailalim ang kanilang mga pasahero sa antigen testing sa loob mismo ng paliparan bago ang kani-kanilang mga flights.
Tanging mga pasahero lamang na nag negatibo sa antigen test ang papayagang makapasok loob ng eroplano.
Samantala, ipapatupad naman ng Cebupac ang free-of-charge pilot run ng TBB simula Disyembre 3 hanggang 14 sa mga pasahero na babyahe mula Manila papuntang General Santos.
