HEADLINES

Nanawagan sa publiko si Vice President at Education Secretary Sara Duterte-Carpio na pangalagaan ang seguridad ng bansa laban sa terorismo.

Sa ika-83 taong anibersaryo ng Koronadal City, South Cotabato at ika-23 pagdiriwang ng Hinugyaw Festival, sinabi ng bise presidente na kailangang malaman ng mamamayan ang kanilang responsibilidad para maprotektahan ang komunidad mula sa iba’t-ibang uri ng karahasan o pag-atake.

Ayon kay Vice President Duterte-Carpio, patuloy na nagsusumikap ang puwersa ng pamahalaan upang mapanatili ang peace and order at masugpo ang mga grupong nagnanais maghasik ng kaguluhan sa iba’t-ibang lugar sa bansa.

Samantala, iginiit din ng pangalawang pangulo ang importansya ng pagtuturo sa mga kabataan kaugnay sa kahalagahan ng edukasyon kung saan, kaniyang tiniyak ang mas malakas na child protection mechanism sa mga paaralan laban sa mga recruitment at child exploitation.

Iginiit ni Philippine Egg Board Association President Gregorio San Diego, Na dapat nang magtalaga si Pangulong Ferdinand “Bongbong” Marcos Jr. ng bagong kalihim sa Department of Agriculture (DA).

Ayon kay San Diego, kailangan nang bitawan ni PBBM ang posisyon bilang Agriculture Secretary dahil sa nagaganap na krisis sa Pilipinas na mas kailangang tutukan partikular na ang ekonomiya at pakikipag-negosasyon sa ibang mga bansa.

Sinabi ni San Diego, na mas mainam kung ipagkakatiwala nalang sa iba ang naturang puwesto at ilaan nalang ng pangulo ang kaniyang oras sa iba pang problema sa bansa.

Naniniwala si San Diego na mas makabubuti kung magtatalaga na si Pbbm ng permanenteng secretary sa DA dahil bukod sa ahensya, kailangan ding matutukan ng Pangulong Marcos ang iba pang isyu sa loob at labas ng bansa.

Umaasa naman si San Diego na mayroong malasakit sa sektor ng agrikultura ang mapipiling papalit bilang bagong kalihim sa sektor ng agrikultura.

Posibleng italaga ni Pangulong Ferdinand “Bongbong” Marcos Jr., bilang susunod na kalihim ng Department of Agriculture (DA) si dating Defense Secretary Gibo Teodoro.

Ito ang naging pahayag ng Philippine Chamber of Agriculture and Food Inc. (PCAFI) kung saan, naging matunog ang pangalan ni Teodoro dahil kasama umano ito sa Uniteam senatorial ticket ni PBBM at VP Sara Duterte Carpio noong nakaraang eleksiyon.

Naniniwala ang grupo na sa darating na Mayo o pagkatapos ng election ban, bababa sa puwesto bilang kalihim ng DA si Pangulong Marcos.

Matatandaang una nang inalok ng posisyon ni PBBM si Teodoro na maging kalihim ulit ng DND pero tinanggihan niya ito dahil mas gusto umano nitong pamunuan ang agricultural sectors.

Samantala, buo naman ang tiwala ng United Broiler Raisers Association (UBRA), na magagampanan at matututukan ng pangulo ang kakulangan at pangangailangan sa sektor ng agrikultura habang wala pa itong napipiling bagong kalihim ng ahensya.

Nagdeklara ng suspensyon ng klase ngayong araw ang ilang lokal na pamahalaan dahil sa masamang panahon.

Walang klase sa lahat ng antas sa Masbate, Masbate City, Mobo, PIO V. Corpus, Samar, Daram, Misamis Oriental, Magsaysay, Northern Samar Province, Zamboanga Peninsula at Zamboanga City.

Kanselado rin ang pasok ng mga estudyante sa piling antas sa Basilan at Lamitan City, partikular sa Pre-School hanggang Senior High School.

Una nang sinabi ng PAGASA na maaari pa ring makaranas ng maulap na kalangitan at pag-ulan ang Bicol Region, Visayas, at Mindanao sa gitna ng pinagsamang epekto ng shear line at Low Pressure Area.

Sasailalim sa lifestyle check ang mga police generals at colonels na nagsumite ng kanilang ‘courtesy resignation’.

Ayon kay PNP chief Pol. Gen Rodolfo Azurin Jr., bahagi ito ng mga gagawing hakbang ng five-man committee na mag a-asses ng courtesy resignations at gagawa ng rekomendasyon kay Pangulong Ferdinand “Bongbong” Marcos Jr.

Batay sa pinakahuling datos, mahigit limandaang high-ranking police officials ang naghain na ng kanilang ‘courtesy resignation’, ngunit hindi pa malinaw kung kabilang dito ang sampung napaulat na sangkot sa illegal drug trade.