Ashley Jose

Walang batas sa Pilipinas na nagpaparusa sa mga tatangging magpabakuna.

Ito ang nilinaw ng Departnment of Justice (DOJ) kaugnay ng naging pahayag ni Pangulong Rodrigo Duterte na dapat arestuhin o ikulong ang mga tatangging magpabakuna kontra COVID-19.

Ayon kay Justice Sec. Menardo Guevarra, wala pang batas sa Pilipinas na nagpapahintulot sa pag aresto, at tumuturing na krimen sa pagtangging magpabakuna.

Kaugnay nito, nanindigan naman sina Senate President Vicente Sotto III at Sen. Joel Villanueva na hindi maaring arestuhin ang mga ayaw na magpabakuna.

Ayon kay Sotto, wala naman kasing nilabag na batas ang mga indibidwal na ayaw magpabakuna, habang sinabi naman ni Villanueva na dapat na mas pagtuunan ng pansin ng pamahalaan ang pagkumbinsi sa publiko na magpa-vaccine.

Naitala sa bansa ang 3,666 na bilang ng bagong kaso ng COVID-19, kahapon, ang pinaka-mababang arawang kaso ng COVID-19 ngayong Hunyo.

Dahil dito, sumampa na sa 1,367,894 ang kabuuang bilang ng COVID-19 sa bansa.

Sa bilang na ito, nasa 52,696 na ang bilang ng aktibong kaso ng COVID-19, habang nasa 1,291 thousand naman ang bilang ng mga nakarekober.

Sumampa naman sa 23,809 ang bilang ng mga nasawi sa COVID-19 sa bansa, matapos na makapag tala ng 60 na bagong pagkasawi kahapon.

Samantala, 12 laboratoryo naman sa bansa ang hindi nakapag sumite ng report kahapon.

Bakunado na ang Mayorya ng mga nasa A1 sector o yung mga healthcare frontliners sa mga itinuturing na priority areas sa bansa.

Ayon kay Health USec. Myrna Cabotaje, nasa 77% na o katumabas ng 1.6-M mula sa 1.7-M bilang na mga nasa A1 sector.

Gayunman, sinabi naman ni Cabotaje na hindi kasali sa bilang ang mga healthcare workers sa ibang bansa, pati na ang mga kapamilya ng mga A1 sector sa bansa.

Sa inilabas na pahayag ng pamahalaan, kabilang ang Metro Manila, Metro Cebu, Metro Davao, Bulacan, Cavite, Pampanga, Laguna, Batangas, at Rizal.

Dinipensahan ng Malacañang ang mga maanghang na banat ni Pangulong Rodrigo Duterte laban sa International Criminal Court (ICC).

Ayon kay Presidential Spokesman Atty. Harry Roque, makatwiran lamang ang mga binitawang salita ng Pangulo laban kay ICC Prosecutor Fatou Bensouda, dahil wala naman aniyang hurisdiksyon o anumang kapangyarihan ang ICC sa Pilipinas.

Sa naging pagharap sa publiko ng Pangulong Duterte, tinawag nitong baliw si Bensouda dahil sa kaniyang hirit na imbestigasyon sa war on drugs ng Pilipinas.

Matatandaang hiningi kasi ni Bensouda ang judicial authorization ng ICC upang makapaglunsad ng malalimang imbestigasyon sa war on drugs ng Pilipinas.

Walang nakikitang mali ang Malacañang sa pabago-bagong desisyon hinggil sa susunding polisiya sa paggamit ng face shield.

Ayon kay Presidential Spokesman Atty. Harry Roque, walang masama kung bigla na lamang kakambiyo ang Pangulong Rodrigo Duterte sa mga polisiyang ipatutupad sa bansa lalo pa’t ibinabatay naman ito sa mga kasalukuyang sitwasyon ng bansa, at sa payo na rin ng mga eksperto.

Samantala, una namang humingi ng paumanhin si Pangulong Duterte kung nagdulot nang pagkalito ang kaniyang inisyal na pahayag sa paggamit ng face shield.

Dapat na magkaroon ng iisang pahayag ang sangay ng ehekutibo hinggil sa susunding polisiya sa paggamit ng face shield.

Ito ang naging panawagan ng ilang senador dahil posible aniyang magdulot nang pagkalito sa publiko ang paiba-ibang pahayag.

Ayon kay Senator Joel Villanueva, dapat na diretsahan lamang ang ilabas na pahayag hinggil sa kung gagawin na lamang boluntaryo, o mananatili pa ring mandatory ang paggamit ng face shield.

Sinabi ni Villanueva, napaka-halaga kasi ng malinaw na polisiya upang madali itong maintindihan ng publiko.

Kaugnay nito, sinabi naman ni Sen. Nancy Binay na dapat maging isang mabuting ehemplo rin ang mga tigapag-patupad ng batas, at sundin ang ipatutupad na polisiya.

Gayunman, sinabi naman ni Sen. Aquilino “Koko” Pimentel III na dapat ibatay ng pamahalaan ang mga polisiyang ipatutupad sa siyensya.

Ayon kay Pimentel, tanging ang Pilipinas lamang kasi ang nag-iisang bansa sa buong mundo na nag-papagamit ng face shield sa mga outdoor areas.

Matatandaang una kasing sinabi ni Presidential Spokesman Harry Roque na pabor si Pangulong Rodrigo Duterte na sa mga ospital na lamang ipaggamit ang face shield, gayunman, sa naging pagharap ng Pangulo sa publiko noong isang gabi ay sinabi nitong obligado pa rin ang publiko na gumamit ng face shield.

Inaasahang dumating sa susunod na buwan ang nasa isang milyong dose na donasyong bakuna ng Estados Unidos sa bansa.

Ito mismo ang kinumpirma ni Philippine Ambassador to U.S. Jose Manuel Romualdez, kung saan ipadadala na aniya ng amerika sa bansa ang nasa 800K hanggang isang milyong dose ng COVID-19 vaccine sa Hulyo.

Bukod dito, sinabi rin ni Romualdez na makakuha din ang Pilipinas ng alokasyon sa donasyon ng Amerika na 500 milyong dose ng Pfizer vaccine sa mga mahihirap na bansa sa buong mundo.

Samantala, tiniyak naman ni U.S. President Joe Biden na kabilang ang Pilipinas sa kanilang prayoridad na mabahagian ng mga donasyong bakuna kontra COVID-19.

Binigyang diin ng Department of Health (DOH) na kailangan pa ring mayroong consent o pahintulot ng vaccinee, bago ito mabakunahan.

Ito ang naging reaksyon ng DOH kaugnay ng naging pahayag ni Pangulong Rodrigo Duterte na dapat arestuhin ang sinumang tatangging magpa-bakuna.

Ayon kay Health USec. Myrna Cabotaje, kailangan kasi munang may pahintulot ng isang indibidwal bago ito mabakunahan.

Bukod dito, iginiit din ni Cabotaje na kailangan ding pirmado ng isang vaccinee ang waiver.

Samantala, tiwala naman si Cabotaje na ang bantang pag-papaaresto ng Pangulo ay bunga lamang ng sobrang pagnanais nito na makamit na ng bansa ang herd immunity, sa pamamagitan ng pagdami ng bilang ng mga bakunadong indibidwal sa bansa.

Habang bumababa na ang arawang kaso ng Coronavirus Disease 2019 (COVID-19) sa National Capital Region (NCR), ay nakitaan naman ng OCTA research group ang limang lungsod sa Visayas at Mindanao ng biglaang pagtaas ng COVID-19 cases.

Batay sa inilabas na report ng OCTA, itinuturing na nilang “areas of concern” ang Davao City, Bacolod, Iloilo City, Cagayan De Oro, at Tacloban dahil sa pagtaas ng kaso ng COVID-19 sa mga nabanggit na lugar simula Hunyo 15 hanggang Hunyo 21.

Batay sa tala ng Department Of Health (DOH), ngayong linggo lamang ay sumipa sa 154  ang kaso ng COVID-19 sa Davao City mula sa 193 kaso noong nakaraang linggo.

Gayunman, napansin din ng OCTA ang pagbaba ng kaso ng COVID-19 sa NCR kung saan naglalaro na lamang, ayon sa OCTA sa 700 kaso kada araw ang bilang ng COVID-19 cases sa NCR.

Inaasahan nang dumating sa bansa, bukas Hunyo 23 ang nasa 2.2 milyong doses na bakuna kontra COVID-19 na likha ng kumpanyang Astrazeneca, mula sa CoVax facility isang vaccine sharing scheme katuwang ang World Health Organization (WHO).

Ito mismo ang kinumpirma ni Health USec. Myrna Cabotaje kung saan nakalaan aniya ang mga nasabing supply ng bakuna para sa mga health workers, senior citizens, persons with comorbidities at indigent population.

Bukod dito, sinabi rin ni Cabotaje na may darating ding supply ng bakuna mula sa Moderna ngayong buwan na ito.

Samantala, sinabi rin naman ni Vaccine Czar Carlito Galvez Jr. na may darating pang 6.4 na milyong doses ng bakuna kontra COVID-19 mula sa iba’t-ibang manufacturer ngayong buwan ng Hunyo.