Umapela na ang Philippine Olympic Commitee (POC) sa publiko na ituon lamang ang atensyon sa pagsuporta sa mga atletang Pinoy sa 2019 Southeast Asian (SEA) Games.
Ito ay sa gitna ng kaliwa’t-kanang reklamo na natatanggap ng SEA games organizing committee mula sa mga atletang kalahok sa nasabing palaro.
Ayon kay POC president Abraham Tolentino, bagamat hindi maiiwasan ang mga aberya sa malalaking event ay hindi dapat maghilahan pababa dahil maari itong makasama sa mga atleta.
Kaugnay nito, tinawag namang ‘isolated incidents’ ng Philippine Southeast Asian Games Organizing Commitee (PHISGOC) ang mga naging isyu sa transportasyon at hotel accommodations ng ilang foreign athletes.
Una rito, naglabas ng pahayag ang Century Park Hotel kung saan ipinaliwanag nito na ang pagbabago sa schedule ng pagdating ng football teams ng Cambodia at Thailand ang dahilan kaya’t hindi agad nabigyan ng matutuluyan ang mga atleta.
