Tiniyak ng Quezon City Police District (QCPD) na mahigpit nilang babantayan ang limang discipline zones sa Quezon City.
Ayon kay QCPD Acting District Director Brig. Gen. Ronnie Montejo, ito ay para mapigilan ang mga krimen at magkaroon ng disiplina sa lungsod.
Aniya, ang unang limang lugar na mahigpit na babantayan ay sa Cubao, West Avenue, Katipunan Avenue, Timog Avenue-Tomas Morato at Novaliches Proper.
Sisimulan na sa Lunes ang dry run at kanilang siniguro na wala silang sasantuhin sa paghuli sa mga lalabag sa mga ordinansa.
Samantala, sinuportahan naman ni Quezon City Mayor Joy Belmonte ang naturang hakbang ng pulisya.
