Pina-aaresto na ng korte ang tatlong Philippine Military Academy (PMA) cadets dahil sa pagkasawi ni Cadet 4th class Darwin Dormitorio sa hazing.
Ayon kay Baguio City Police Chief Col. Allan Rae Co, ipinag-utos na ng mababang korte sa Baguio City ang pagaresto kina Cadets Shalimar Imperial Jr., Felix Lumbag Jr. para sa kasong murder at kay Cadet Julius Carlo Tadena para naman sa kasong hazing at ‘less serious physical injuries’.
Kaugnay nito, nag isyu din ang RTC First Judicial Region Branch 5 ng warrant of arrest laban kina dating PMA Station Hospital Chief Lt. Col. Ceasar Candelaria, at medical officers Capt. Flor Apple Apostol at Maj. Maria Ofelia Beloy na pawang mga nahaharap sa kasong murder.
Gayunman, wala namang piyansang inirekumenda ang mababang korte para sa mga kadete.
Matatandaang Setyembre noong nakaraang taon nang masawi si Dormitorio dahil sa tindi nang bugbog na tinamo nito mula sa kanyang kapwa mga kadete.
