Iginiit ng Department of Finance o DOF na wala pang pangangailangan para humirit ang mga transport group ng taas pasahe.
Ayon kay Finance Secretary Sonny Dominguez, hindi pa apektado at wala pang pagtaas sa presyo ng mga produktong petrolyo na bunsod ng Tax Reform for Acceleration and Inclusion o TRAIN sa ngayon.
Dagdag pa ni Dominguez, magbibigay din ng subsidiya ang pamahalaan sakaling tumaas naman ang presyo ng gasolina at langis dahil sa pagpapatupad ng bagong tax program.
Aniya, nasa 900 milyong pisong pondo ang ipalalabas ng pamahalaan sa pamamagitan ng mga fuel vouchers na ipamamahagi ng Land Transportation Franchising and Regulatory Board o LTFRB at Department of Transportation o DOTr sa mga tsuper.
Naniniwala rin si Dominguez na hindi pa kinakailangang ipamahagi agad ang mga nasabing vouchers sa ngayon.
‘Babala ng LTFRB’
Samantala, binalaan ng Land Transportation Franchising and Regulatory Board o LTFRB sa mga transport group na magtataas ng kanilang pasahe.
Ito’y matapos makatanggap ng ulat ang ahensya na nakatanggap na umano ng abiso kaugnay sa dagdag pasahe ang ilang pasahero mula sa ilang operator na nagpapatakbo ng UV Express.
Ayon kay LTFRB Board Member Atty. Aileen Lizada, kailangan munang magsumite ng isang transport group ng fair petition bago mag-anunsyo ng pagtataas ng kanilang pasahe.
Dagdag pa ni Lizada, hindi maaari sila lang ang magdedesisyon kung magkano ang kanilang idadagdag na pasahe dahil tiyak na sila’y mahaharap sa asunto.
- Jennelyn Valencia