Itinanggi ni National Bureau of Investigation (NBI) Deputy Director for Special Investigation, Atty. Antonio Pagatpat na pansamantalang nag-shutdown ang mga CCTV sa selda ng mga high-profile inmate sa kanilang headquarters, sa Maynila noong Biyernes ng gabi.
Ayon kay Pagatpat, nagkaroon lamang ng minor glitch sa monitoring system at walang dapat ipangamba dahil mayroon naman silang footage back-up system.
Isinaayos anya ang naging problema makalipas ang ilang minuto at wala rin namang naging kahina-hinalang aktibidad sa detention facility.
Magugunita noong 2013 ay nakatakas sa NBI compound si dating Senior Supt. Cesar Mancao, na sangkot umano sa Dacer-Corbito murder case.
By Drew Nacino