Naniniwala si Senator Sergio Osmeña na maraming give and take o trade-offs na mangyayari sa pagitan ng tatlong posibleng tumakbo sa 2016 elections na kinausap ng Pangulong Noynoy Aquino.
Ipinaliwanag ni Osmeña na ito ay dahil mayroong kailangang magsakripisyo kina Department of Interior and Local Government (DILG) Secretary Mar Roxas, Senator Grace Poe at Senator Chiz Escudero.
Nilinaw ni Osmeña na bagamat sigurado na mayroong mangyayaring trade-off hindi naman siya tiyak kung ano ang iaalok sa papayag na mag-sakripisyo.
Samantala, hindi naman pabor si Osmeña sa tambalang Poe-Escudero dahil magiging pabigat lang aniya si Escudero kay Poe.
Palasyo
Tikom pa din ang bibig ng Malacañang, hinggil sa ginawang pulong kagabi sa Palasyo, nina DILG Secretary Mar Roxas, Senators Grace Poe at Chiz Escudero.
Ipinaliwanag ni Presidential Communications Secretary Sonny Coloma, na malinaw naman ang nais ng Pangulong Noynoy Aquino at ito ang maipagpatuloy ang daang matuwid na mangyayari lamang kung ang matapat na lider ang maihahalal ng publiko.
Tiwala din si Coloma na walang negatibong epekto sa Partido Liberal ang madalas na pakikipagpulong ng Pangulo kay Poe.
By Katrina Valle | Cely Bueno (Patrol 19) | Aileen Taliping (Patrol 23)