Tatlong drug courier ang nasakote ng National Bureau of Investigation o NBI sa magkakahiwalay na operasyon sa Pasay at Pasig Cities.
Nasabat mula sa tatlong suspek na kinilalang sina Maria Clara Bedico, Alvin Avila at Antonette Mendiola ang mahigit tatlong kilo ng cocaine na nagkakahalaga ng nasa 30 milyong piso at itinago sa loob ng mga librong pambata.
Ayon sa NBI, iba-biyahe sana patungong Bangkok, Thailand mula Brazil via Manila ang mga drogang isinilid sa limang libro.
Marso 28 nang dumating sa bansa si Bedico na may bitbit ng mga libro at matapos nito ay pumunta sa isang fast food malapit sa Ninoy Aquino International Airport Terminal 3 sa Pasay upang makipag-kita kay Avila na tutulong sa pag-rebook ng kanyang flight.
Naaresto naman sa follow-up operation ang umano’y kasabwat nina Bedico at Avila na si Mendiola sa Pasig City noong Biyernes, Marso 29.
Pinaniniwalaang ni-recruit ang tatlo ng mga asawa ng mga miyembro ng Western African drug syndicate.
(with report from Aya Yupangco)