Humihirit ng dagdag kontribusyon ang Social Security System (SSS) upang mapondohan ang panukalang expanded maternity leave benefits.
Ayon sa SSS, aabutin ng apat hanggang limang bilyong piso ang kailangan kada taon upang mapondohan ang nasabing panukala o katumbas ng tatlo hanggang apat na porsyentong increase sa kontribusyon.
Aminado naman si SSS President Emmanuel Dooc na bagaman kaya nilang i-cover ang benefits ng mga member, mahihirapan naman ang institusyon lalo’t nagpautang sila sa mga miyembrong naapektuhan ng mga nakaraang kalamidad.
Kung tutuusin anya ay malaki na ang naging epekto sa kanilang pondo ng P1,000 additional benefit sa mga retiradong miyembro o katumbas ng P33.5 bilyon na ipinatupad noong isang taon.
Masusundan pa aniya ito ng dagdag P1,000 o kabuuang P2,000 hike sa SSS pension benefits na ipinangako ni Pangulong Rodrigo Duterte kaya’t maaaring lumiit ang pondo institusyon sa susunod na pitong taon.