Wala pang nakikitang dahilan si House Committee on Ways and Means Chairman Dakila Cua para ipatawag si Davao City Vice Mayor at Presidential Son Paolo Duterte sa pagdinig ng Kongreso kaugnay sa Bureau of Customs (BOC).
Ayon kay Cua, kailangan pa nilang pag-aralan ang isinawalat ng importer broker na si Mark Taguba sa umano’y pagkakasangkot ng nakababatang Duterte sa suhulan sa BOC.
Ani Cua, lilinawin pa nila ang nasabing usapin sa susunod na pagdinig ng Kongreso at nakadepende aniya sa magiging sagot ni Taguba kung kailangang ipatawag si Vice Mayor Duterte.
Matatandang sa ikalawang pagdinig ng Kamara ay nadawit si Vice Mayor Duterte matapos sabihin ni Taguba na malaki ang hinihinging tara o suhol ng isang Tita Nani dahil sa umano’y hawak na grupo ng bise alkalde sa Davao.
Nilinaw din ni Taguba sa nasabing pagdinig na hindi niya personal na kilala si Vice Mayor Duterte at hindi siya naniniwala sa pagdawit dito dahil tsismis lamang ito sa BOC.