Nananatiling tensyonado ang sitwasyon sa Iligan City.
Kasunod na rin ito nang paggigiit ng mga supporter nang nakakulong na si Mayor Celso Regencia na makabalik ito sa City Hall.
Iginigiit din ng Regencia supporters ang pagbaba sa puwesto ni Vice Mayor Roderick Marzo na acting mayor ng lungsod kasunod nang pagtatapos ng anim na buwang suspensyon ni Regencia noong Lunes.
Sinabi naman ni Marzo na hindi siya bababa sa puwesto dahil nakakulong pa si Regencia at hindi nito magagampanan ang kaniyang tungkulin.
Bukod pa ito aniya sa inisyung direktiba ng DILG na dapat muna siyang manatiling acting mayor ng lungsod.
Si Regencia ay sinuspindi ng Malakaniyang matapos umanong umabuso sa kapangyarihan nang alisan ng kapangyarihan ang kaniyang Vice Mayor na magtalaga ng job order employees.
Ang suspendidong alkalde ay pinaaresto rin dahil sa pagkakadawit umano sa bigong pag-ambush kay Iligan City Congressman Vicente Belmonte noong 2014 na ikinasawi ng tatlong security aides ng mambabatas.
By Judith Larino