Inaasahang bahagyang babagal ang takbo ng mga tren ng Philippine National Railways (PNR) sa pagbabalik ng operasyon nito sa susunod na linggo.
Ginawa ni PNR General Manager Joseph Allan Dilay ang pahayag kasunod nang isinagawang huling test run sa mga tren ng PNR kahapon ng umaga.
Sa test run, bumiyahe ang isang diesel multiple unit na tren mula Tutuban hanggang Alabang sa bilis na 40 kilometro kada oras (kph) lamang kaya’t inabot ng isang oras bago ito tuluyang nakarating sa Muntinlupa.
Sinabi ni Dilay na ipatutupad nila ang mas mabagal na pagpapaandar sa mga tren mula sa dating 50 kph nito para masigurong ligtas ang biyahe ng kanilang mga pasahero.
Target ng PNR na muling makabiyahe sa susunod na linggo.
By Mariboy Ysibido