Binalaan ng Philippine National Police o PNP ang publiko laban sa bagong modus operandi na tinatawag na bestfriend gang.
Ang estilo, lalapit ang suspek sa isang tindahan ng gadget kung saan mayroong ibang kostumer at magtatanong ito hinggil sa ibinebentang produkto.
Pasimpleng babatiin ng suspek ang isa pang kostumer para maipakita sa tindera na magkakilala ang dalawa.
Kapag nalingat na ang tindera, tatangayin na ng suspek ang gadget at iiwanan ang binating kostumer.
Hindi mapapansin ng tindera na wala na ang suspek at sa kalauna’y maiisip na lamang na ginamit nito ang kapwa kostumer para maitakas ang ibinebentang produkto.
Ayon kay PNP Public Information Office Chief of Operations C/Insp. Bryan Gregorio, higit aniyang kaawa-awa ang mga tindera lalo’t sila ang pinagbabayad ng mga nawawalang produkto.
By Jaymark Dagala