Nag-negatibo sa drug test ang isang 12 taong gulang na lalaki na nahuli ng Philippine Drug Enforcement Agency o PDEA na nagbebenta ng ipinagbabawal na droga sa Meycauayan City, Bulacan.
Sa panayam ng DWIZ, nilinaw ni PDEA Region 3 Director Gladys Rosales na hindi ito ang unang pagkakataon na may naarestong menor de edad sa isang drug bust operation ng mga awtoridad sa rehiyon.
Ayon kay Rosales, ilang beses na rin itong nangyari sa nakalipas na mga panahon at karaniwang ginagamit ng mga sindikato ng droga ang mga bata para sa kanilang illegal na gawain dahil sa ilalim ng batas ay hindi maaaring ikulong ang mga menor de edad.
Wala rin aniyang batas ang Pilipinas na nagpaparusa sa mga magulang ng mga batang sangkot sa krimen.
“Yan ang medyo wala sa batas natin ang pananagutan ng magulang, although meron tayo kung hindi ako nagkakamali, ang Mandaluyong meron silang city ordinance na ipinasa na kung saan kung magkakaroon ng violation ang mga minor ay may liability ang mga magulang.” Ani Rosales.
Nagbabala naman si Rosales na hindi sila titigil hangga’t hindi nahuhulog sa kamay ng batas ang pangunahing target sa naturang operasyon na si “Alyas Parak” na hinihinalang miyembro ng Philippine National Police o PNP.
“Initial transaction pa lang kasi yun, bago ka kasi bigyan ng malaking volume kailangan yung ma-establish mo muna na bumibili ka so ang initial na transaction namin, ang inorder namin is 25 grams kaya lang nung hinatid ng batang ito, 1 gram lang ang dinala niya parang sample lang siguro, yun ang ka-transaksyon namin pero nung delivery na, bata yung pinaghatid niya.” Pahayag ni Rosales.
Samantala, nai-turn over na sa City Social Welfare and Development ang bata.
By Rianne Briones | Jelbert Perdez | Ratsada Balita