Dapat isapubliko na ng Philippine Drug Enforcement Agency sa lalong madaling panahon ang listahan ng mga barangay officials na kabilang sa narco list.
Ito ang hamon ni Iligan City Rep. Frederick Siao sa PDEA kasunod na rin ng pahayag ni PDEA Director Aaron Aquino na naglalayong pigilang makaupo sa puwesto ang mga naturang opisyal.
Ayon kay Siao, posibleng mawala ang kredibilidad ng PDEA kung hindi nila agad ilalabas ang listahan gayung tatlong linggo na lamang ang nalalabi bago ang halalang pambarangay.
Maliban sa mga opisyal ng barangay na sangkot sa iligal na droga, dapat din aniyang isapubliko ng PDEA ang listahan ng 44 na barangay na seryosong apektado nito.