Lusot na sa ikatlo at huling pagbasa sa kamara ang panukalang nagpapaliban sa Barangay at Sangguniang Kabataan elections na nakatakda sana sa ika- 14 ng Mayo ngayong taon.
Sa botong 164 na “yes” at 27 “no” ay naipasa na sa plenaryo ang House Bill 7378 na naglalayong ipagpaliban ang nasabing halalan sa Mayo at iurong ito sa ikalawang lunes ng Oktubre ngayong taon.
Batay sa panukala , mananatili muna ang mga “incumbent officials” sa kanilang pwesto hanggang palitan sila ng mga bagong opisyal na mahahalal.
Isasabay ang Barangay at SK Election sa plebesito sa panukalang pag-amiyenda sa saligang batas.
Una nang sinabi ng ilang mga Senador na malabo nang matalakay sa mataas na kapulungan ng Kongreso ang nasabing panukala dahil hanggang Miyerkules na lamang ang kanilang sesyon dahil lenten break na.
