Galing sa oposisyon ang mga paninira laban kay Senadora Grace Poe.
Ito ang binigyang diin ni Liberal Party Chairman for Political Affairs at Caloocan Representative Edgar Erice sa harap ng tangkang pagpapatalsik kay Poe sa senado sa isyu ng citizenship at pagiging foundling.
Iginiit ni Erice na bahagi ito ng umiinit na demolition job laban kay Poe dahil sa alam naman ng lahat bahagi si Poe ng Daang Matuwid.
Kumpiyansa rin si Erice na sakali mang natuloy ang paghahain ng petisyon laban kay Poe ay tiyak aniyang maibabasura lamang ito.
No deadline
Samantala, handang hintayin ng Liberal Party si Senadora Grace Poe na makapagdesisyon kung tatakbo ito bilang running mate ni Department of Interior and Local Government (DILG) Secretary Mar Roxas sa 2016 elections.
Ayon kay Liberal Party Chairman for Political Affairs at Congressman Edgar Erice, ito ay kahit pa sa panahon ng filing ng certificate of candidacy.
Binigyang diin ni Erice na wala silang deadline na ibinibigay kay Poe para malaya aniyang makapag-isip ang senadora hinggil sa plano nitong pagtakbo.
Kumpiyansa naman si Erice na sa huli ay bibigay din si Poe sa panliligaw ng Liberal Party na tumakbo itong Bise Presidente sa ilalim ng administrasyon.
By Ralph Obina