Pursigido si Pangulong Rodrigo Duterte na bukod sa ipagpaliban ang Barangay Elections at tuluyan ng tapusin ang termino ng lahat ng Barangay official at palitan na lamang ng mga appointee.
Ito ang inamin ni Local Government Secretary Ismael Sueno sa kanyang pagdalo sa 15th meeting ng ASEAN Senior Officials Responsible for Information sa SMX convention center sa Bacolod city, Negros Occidental.
Ayon kay Sueno, gaya ng dati ay nais matiyak ni Pangulong Duterte na hindi popondohan ng mga druglord ang kandidato sa Barangay Elections kaya’t ipinagpaliban ang nasabing halalan noong Oktubre.
Sa ilalim ng plano ng Pangulo, idedeklarang bakante ang lahat ng barangay posts sa Oktubre at itatalaga ang mga personalidad na hindi sangkot sa iligal na droga.
Kung tutuusin anya ay maaari ng ideklarang bakante ang mga pwesto ng mga Barangay Official lalo’t nagtapos na ang termino ng mga ito noon pang isang taon.
Samantala, wala namang binanggit ang kalihim hinggil sa pagpapaliban naman ng Sangguniang Kabataan elections.
By: Drew Nacino