Itinanggi ng Malacañang na mapaghiganti o “benggador” si Pangulong Rodrigo Duterte laban sa mga bumabatikos at kumakalaban sa kanya.
Sa harap na rin ito ng plano ni Pangulong Duterte na paimbestigahan si Overall Deputy Ombudsman Arthur Carandang dahil sa issue ng tago umanong yaman ng kanyang pamilya na binubusisi ng Tanodbayan.
Ayon kay Presidential Spokesman Ernesto Abella, pananaw lamang ng ibang tao ang sinasabing pagiging mapaghiganti ng Pangulo dahil sa istilo ng kanyang mabibigat na pananalita.
Gayunman, tao lamang aniya si Pangulong Duterte na minsan ay emosyonal pero kumikilala sa batas.
Nilinaw din ng tagapagsalita ng Palasyo na hindi pagbabanta kay Carandang ang ginawa ng Punong Ehekutibo nang sabihing magdasal na ito dahil siya ang uunahin kapag nagkagulo sa bansa.
Online petition to open bank accounts
Samantala, nasa pagpapasya na ni Pangulong Rodrigo Duterte kung lalagdaan o hindi ang waiver para buksan ang kanyang bank accounts.
Ito ang tugon ni Abella sa inilunsad na online petition ng change.org na humihiling kay Pangulong Duterte na pirmahan na ang waiver para mabuklat ang kanyang bank records at mabatid kung tama o mali ang akusasyon ni Senador Antonio Trillanes IV.
Ayon kay Abella, prerogative na ng Pangulo na gawin kung ano ang inaakala nitong tama at hindi ito maaaring diktahan ng kahit na sino.
Naunang inihayag ng Pangulo na panahon pa ng eleksyon ang akusasyon sa kanya ni Trillanes na may mahigit 200 million pesos sa bangko pero wala naman aniyang maipakitang ebidensiya ang senador.
—-