Nagpahayag umano ng interes si Pangulong Rodrigo Duterte sa muling pagbuhay ng usapang pangkapayapaan sa pagitan ng pamahalaan at CPP- NDF o Communist Party of the Philippines National Democratic Front.
Ito ay ayon kay Bayan Muna Partylist Representative Carlos Zarate kasunod ng isinusulong na resolusyon ng mga mambabatas sa House of Representatives kaugnay sa pagbabalik ng peacetalks.
Paliwanag ni Zarate, nag-ugat ang House Bill Resolution 1803 na humihikayat kay Pangulong Duterte na magbalik sa negotiating table nang kanilang maka-usap ang mga opisyal mula sa Royal Norwegian Government na siyang facilitator sa peacetalks.
Matapos aniya nito ay nagtungo naman sa Davao City ang mga opisyal ng Royal Norweigan Government para kausapin si Pangulong Duterte kung saan nagpahayag umano ito ng pagiging bukas sa panunumbalik ng usapang pangkapayapaan.
Dagdag ni Zarate, bagama’t nagkaroon ng mga palitan ng mga maanghang na salita sa pagitan ng dalawang panig at pagsasampa ng kaso para ideklarang terrorista ang CPP-NPA ay nagpahayag pa rin ang NDF ng pagiging bukas sa peacetalks.
Kasabay nito, sinabi ni Zarate na bukod sa 60 mga kongresistang una nang pumirma sa resolusyon, may ilan pang nagpahayag na rin ng suporta at nagsabing pipirma na kanilang isinusulong na House Bill Resolution 1803.