Hindi basta maaaring absuweltuhin ni Pangulong Rodrigo Duterte sina Ilocos Norte Governor Imee Marcos at kapatid nitong si dating Senador Bongbong Marcos sa mga pang-abuso noong panahon ng batas militar.
Ito ang binigyang diin ni Albay Rep. Edcel Lagman matapos ang pahayag ng pangulo na hindi maaaring isisi kina Imee at Bongbong ang kasalanan ng kanilang amang si dating Pangulong Ferdinand Marcos.
Ayon kay Lagman, matagal nang nakikinabang ang magkapatid sa tago-umanong yaman ng kanilang amang si dating Pangulong Ferdinand Marcos kaya’t hindi maaaring sabihin na walang kasalanan ang mga ito.
Nasa hustong gulang na anya ang mga nakababatang Marcos matapos ideklara ang martial law at batid na ng mga ito ang mga ginagawang pang-aabuso sa mga mamamayan ng kanilang mga magulang.