Inilaglag ni dating Health Secretary Paulyn Ubial ang asawa ni dating Health Secretary Janette Garin na si Iloilo Rep. Oscar Garin Jr.
Sa isinagawang joint hearing ng Senate Blue Ribbon at Health Committee kahapon, ibinunyag ng dating kalihim na inudyukan umano siya ng Kongresista na bumili pa ng maraming Dengvaxia vaccine.
Sinegundahan naman ito ni Cebu Rep. Gwen Garcia para mapalawak pa ang Dengue immunization program ng pamahalaan sa Central Visayas.
Dagdag pa ni Ubial, sa kabila ng kaniyang mariing pagtutol sa nasabing programa, napilitan siyang ipatupad ito dala na rin ng pressure.
Ito ang dahilan ayon kay Ubial kaya’t nabasura ang kaniyang nominasyon bilang kalihim ng kalusugan sa makapangyarihang Commission on Appointments.