Muling isinusulong ng Department of Foreign Affairs o DFA ang pagsasampa ng kaso laban sa mga umano’y illegal recruiter ni Mary Jane Veloso, ang Pinay drug convict sa Indonesia.
Sinabi ni DFA Spokesperson Assistant Secretary Charles Jose na kung mapatutunayang inosente si Veloso sa krimen at biktima lamang ito ay posible aniya itong gamitin upang maging basehan para makapag-request ng clemency ang DFA mula sa Indonesia.
Ang mga sinasabing recruiter ni Veloso ay sina Maria Cristina Sergio, Julius Lacanilao at isang pang Aprikano pero una nang sinabi ni Sergio na hindi siya ang nag-recruit sa nasabing OFW.
Ang pahayag na ito ng DFA ay kasunod ng inilabas ng National Narcotic Agency ng Indonesia na mahigit sa 50 drug convicts anila ang nanganganib mabitay ngayong taon.
Batay naman sa ulat ng Jakarta Post, 14 sa convicts ay naghihintay na lamang na mabitay pero hindi pa tinukoy ang mga pangalan at nationalities ng mga ito.
By Allan Francisco