Hindi na papayagan ng COMELEC o Commission on Elections na kumuha ng body guard ang mga kandidatong tatakbo sa barangay at SK elections.
Nakasaad sa ilalim ng Resolution No. 10179, walang sinumang kandidato o re-electionist sa nalalapit na halalan ang maaaring kumuha ng serbisyo ng security personnel pribado man o sa ilalim ng Philippine National Police at Armed Forces of the Philippines.
Maliban dito, ipatutupad na rin ng COMELEC ang gun ban o pagbabawal sa pagdadala ng armas at mga patalim sa labas ng bahay at pampublikong lugar.
Ito ay kahit na malaki ang posibilidad na maipagpaliban ang barangay at Sangguniang Kabataan elections ngayong taon.
Magsisimula ng tumanggap mula September 21 ang COMELEC Committee on the Ban of Firearms and Security Personnel ng aplikasyon para sa issuance ng authority sa pagbibitbit o pagbibiyahe ng mga armas at mga patalim.
(Ulat ni Aya Yupangco)