Magsisilbi na umanong “wake-up call” para kay Pangulong Rodrigo Duterte ang pagbaba ng kanyang net satisfaction rating sa “good” mula sa dating “very good.”
Sa latest S.W.S. Survey noong September 23 hanggang 27, mula sa plus 66 percent noong Hunyo ay sumadsad sa plus 48 percent na lamang ang satisfaction rating ni Pangulong Duterte.
Pinayuhan ni opposition Congressman at Caloocan City 2nd District Rep. Edgar Erice ang Pangulo na panahon na para makinig din sa mga kritiko nito partikular sa war on drugs ng gobyerno.
Ayon kay Erice, nagiging sanhi na ng kahihiyan ang kampanya kontra iligal na droga hindi lamang sa bansa kundi sa ibang bahagi ng mundo.
Nagbabadya na rin anya ang pagpalya ng kampanya laban sa droga dahil ilang bansa na ang gumawa ng hakbang katulad sa Pangulo pero hindi na-solusyunan ang malalang problema sa illegal drugs.