Kinumpirma ni Agriculture Secretary Manny Piñol na ibabalik na sa ilalim ng Department of Agriculture (DA) ang National Food Authority (NFA) at iba pang tanggapan na konektado sa agrikultura.
Matatandaan na inilagay noon ng dating Pangulong Noynoy Aquino sa ilalim ng kanyang tanggapan ang NFA, ang National Irrigation Administration, Philippine Coconut Authority at Fertilizer and Pesticide Authority.
Kinumpirma rin ni Piñol ang plano ng Pangulo na buwagin na ang NFA Council na siyang gumagawa ng mga polisiya para sa NFA.
Gayunman, sakali aniyang magtuloy-tuloy pa rin ang konseho, mas magiging maayos na ang takbo ng operasyon ng NFA dahil mapupunta na sa DA ang chairmanship ng konseho.
Sinabi ni Piñol na mas magkakaroon na sila ng pagkakataon na palakasin pa ang NFA para hindi lamang bigas ang tinututukan nito.
Ipinaliwanag ni Piñol na nais niyang maisama sa mandato ng NFA ang pagtiyak na magkakaroon ng tamang distribusyon ng pagkain at hindi bigas lamang sa iba’t ibang panig ng bansa.
—-