Isasailalim sa extreme enhanced community quarantine ang Navotas City simula alas-5 ng umaga sa Miyerkules, ika-6 hanggang ika-15 ng Mayo.
Ayon kay Navotas City Mayor Toby Tiangco, kinakailangan nilang magpatupad ng mas mahigpit at matinding aksyon sa lungsod para sa nalalabi pang mga araw ng umiiral na enhanced community quarantine (ECQ) sa Metro Manila.
Aniya, layunin ng hakbang ang makamit na ang tinatawag na ‘flattening of the curve’ sa Navotas bilang paghahanda na rin sa posibilidad ng pagpapatupad ng general community quarantine.
Sinabi ni Tiangco, sa ilalim ng extreme enhanced community quarantine, papayagan lamang ang isang miyembro ng pamilya na makalabas para bumili ng mga pangangailangan tulad ng gamot at pagkain sa mga itinakda lamang na araw.
Tuwing Lunes, Miyerkoles at Biyernes, tanging mga residente lamang sa Barangay Bangkulasi, BBS, Daanghari, Navotas East, NBBS Kaunlaran, Sipac-Almacen, SRV, Tangos North at Tanza 1 ang makalalabas.
Habang tuwing Martes, Huwebes, Sabado naman ang mga taga-Barangay BBN, Navotas West, NBBN, NBBS Dagat Dagatan, NBBS Proper, San Jose, San Roque, Tangos South at Tanza 2.
Sarado naman ang mga palengke tuwing linggo para maisailalim sa disinfection.