Ibinunyag ng Philippine Drug Enforcement Agency o PDEA Region 12 na kasamahan ng naarestong high value target sa Koronadal City na si Alvin Keith Valerio ang mga bigtime drug lord at negosyante na sina Balong Espinosa at sumukong si Maasim Mayor Aniceto Lopez Jr.
Ayon kay PDEA-Region 12 Director Gil Cesario Castro, mga financer ng droga sina Espinosa at Lopez sa mga lugar kung saan gumagalaw ang grupong kinabibilangan ni Valerio.
Napag-alaman na kasapi si Valerio ng El Patron Group na isang malaking grupo na binubuo ng mga big time drug lord at kumikilos sa Region 12 partikular na sa South Cotabato, GenSan at Sultan Kudarat.
Matatandaang, nasamsam ng PDEA Region 12 ang halos isang milyong pisong halaga ng shabu, mga armas at iba pang drug paraphernalia sa kanilang isinagawang operasyon laban kay Valerio kahapon.
—-