Nagpahayag ng pangamba ang mga transport group hinggil sa planong jeepney modernization na isinusulong ng DOTR o ng Department of Transportation.
Ito’y sa kanilang paghaharap sa isinagawang pagdinig ng House Committee on Transportation, nilinaw naman ng iba’t ibang grupo kabilang na ang PISTON o Pinagkaisang Samahan ng Tsuper at Operators Nationwide na suportado naman nila ang isinusulong na modernisasyon ng pamahalaan.
Gayunman, nilinaw ni PISTON President George San Mateo na hindi jeepney phaseout ang sagot kung hindi mga bagong programa na makapagbibigay ng tama at epektibong pagbibigay serbisyo sa mga pasahero.
Nababahala naman si PCDO-ACTO President Efren de Luna na maging suwelduhan ang mga tsuper ng jeepney sa ilalim ng bagong mekanismo at pamiliin pa sila ng gagamiting source ng enerhiya ng sasakyan tulad ng solar, Euro-4 engine o de kuryente.
Sa panig naman ng FEJODAP, sinabi ni ka Zeny Maranan na maghahain sila ng petisyon sa LTFRB o Land Transportation Franchising and Regulatory Board na itigil muna ang omnibus franchise para sa mga PUV’S dahil tiyak na tatamaan dito ang mga operator.